पर्यटन विभागले १४ वटा क्यासिनोलाई सञ्चालन इजाजतपत्र नवीकरण रोयल्टी भुक्तानी गर्न सूचना जारी गरेको छ ।

आर्थिक वर्ष २०७८\०७९ सम्म नियमित रुपमा रोयल्टी रकम दाखिला गरी नवीकरण भएका र आर्थिक वर्ष २०७९\०८० को लागि क्यासिनो सञ्चालन इजाजत पत्र नवीकरणको रोयल्टी रकम भुक्तानी गर्न विभागले शनिबार एक सूचना जारी गर्दै आग्रह गरेको हो ।

क्यासिनो नियमावली, २०७० को नियम १३ बमोजिम कागजात पेश गर्नुपर्ने क्यासिनो आधुनिक मेसिन वा उपकरणको माध्यमबाट मात्र खेलाइने अनुमति पाएका कम्पनीले रोयल्टी रकम भुक्तानी नगरे इजाजत नवीकरण नहुने र इजात नै रद्द गर्ने जनाएको छ ।

विभागले जारी गरेको सूचना अनुसार नेपालगञ्जका ५ वटा क्यासिनोले इजाजतपत्र नवीकरण र रोयल्टी भुक्तानी नगरेको देखिएको छ । इजाजतपत्र नवीकरण र रोयल्टी भुक्तानी नगर्ने क्यासिनोटहरुमा न्यू होटल सिद्धार्थ परिसरमा सञ्चालित ज्याकपट गेमिङ सेन्टर प्रा.लि, होटल स्टारलाईटमा सञ्चालित भेन्यू रिक्रियसन, कल्पतरु होटलमा सञ्चालित ओम त्रयम्बक्म इन्टरटेनमेन्ट, होटल सीटी प्यालेसमा सञ्चालित सेपियर इन्टरटेनमेन्ट, र स्नेह होटल नेपागञ्जमा सञ्चालित बेलिज इन्टरटेनमेन्ट प्रा.लि रहेका छन् ।