कोभिड–१९ बाट थलिएको पर्यटनलाई पुनरुत्थान गर्न तीनै तहका सरकारबीच समन्वय गरेर बजेट निर्माण तथा पर्यटन प्रवर्द्धन हुने खालका कार्यक्रम ल्याउन पर्यटन क्षेत्रका विज्ञहरूले पर्यटन बोर्डलाई सुझाव दिएका छन् ।

बिहिबार पर्यटन बोर्डले भर्चुअल माध्यमबाट आव २०७८/0७९ को बजेटका सन्दर्भमा गरेको अन्तक्रिया कार्यक्रममा धारणा राख्दै विज्ञहरूले यस्तो सुझाव दिएका हुन ।

उनीहरुले कोभिडका कारण पर्यटकीय गतिविधि ठप्प हुँदा बोर्डको बजेटको आकार खुम्चिने भन्दै  बजेटबाट सीमित स्रोतको अधिकतम प्रयोग हुने गरी कार्यक्रम तर्जुमा गर्न सुझाव दिएका छन् ।

विज्ञहरूले स्वास्थ्य सुरक्षालाई ध्यान दिँदै खोपको सुनिश्चितता गर्न र विस्तारै पर्यटनलाई चलायमान बनाउँदै लैजानुपर्नेमा जोड दिदै आन्तरिक पर्यटन प्रवर्द्धन गर्ने खालको जनशक्ति विकास, पर्यटकीय प्रडक्टको विकास गर्दै डिजिटल मार्केटिङमा जोड दिनुपर्ने बताए ।

भर्चुअल कार्यक्रममा बिज्ञहरू पूर्व पर्यटन सचिव दीपेन्द्रपुरुष ढकाल, डा.विष्णुप्रसाद गौतम, डा.प्रेम शर्मा, डा.आलोक प्रसाई, प्राध्यापक डा.सोमप्रसाद खतिवडा, रामचन्द्र सेढाइँ, चेतनाथ कँडेल, सूर्यकिरण श्रेष्ठ, रमेश उपाध्याय, पशुपति न्यौपाने र ज्ञानेन्द्ररत्न तुलाधरको सहभागिकता रहेको थियो ।

बोर्डका उपाध्यक्ष चन्द्रप्रसाद रिजालले कोभिडका कारण पर्यटन व्यवसाय ठप्प भएको अवस्थामा बोर्ड बजेट निमार्णको चरणमा रहे पनि सीमित साधनबाट अधिकतम काम गर्ने गरी तयारी गरिरहेको बताए । बोर्डका सदस्य कृष्ण शाह र पम्फा पौडेल धमलाले बोर्डले स्रोत खुम्चिएको अवस्थामा सरकारसँग सहयोगको अपेक्षा गरेको बताए ।